Makocha watatu Wazungu wamrejesha Kaseja Simba

MAKOCHA wa kigeni, ambao wamewahi kuifundisha Simba na Yanga wamechambua uamuzi uliofanywa na klabu ya Msimbazi kwa kumuacha kipa wao namba moja, Juma Kaseja.

James Siang’a

Kocha wa zamani wa Simba, James Siang’a amesema Simba imefanya kosa kubwa kumuacha Juma Kaseja katika usajili wake na kwamba watajutia mbele ya safari.

Akizungumza na Mwanaspoti kutoka kwao Bungoma, Kenya jana Jumatatu, Siang’a alisema: “Kaseja ni Simba damu, ana uwezo mkubwa na pia ana uzoefu mkubwa.”

 

“Kipa anapofikisha miaka 35 mpaka 40 ndio ubora wake unaongezeka, kwa hiyo hiki ndio kipindi ambacho Simba walitakiwa kupata matunda ya Kaseja na si kumtupa kama walivyofanya,” alisema Siang’a ambaye aliipeleka Simba katika hatua ya makundi ya Ligi ya Mabingwa Afrika mwaka 2003.

Siang’a alisema ipo siku Simba watarudi kumbembeleza Kaseja, lakini kipa huyo atawapa masharti magumu na watashindwa kumchukua hivyo ni vyema wabadilishe uamuzi sasa na kuwa naye kwa msimu mwingine zaidi.

“Sidhani kama Simba wamemuacha kwa sababu ya uwezo. Nimekaa na Kaseja namjua vizuri, huenda alitaka fedha nyingi, lakini lilikuwa jambo jepesi tu la kumalizana naye,” alisema.

Siang’a, ambaye amewahi kuwa kipa wa Harambee Stars, aliishauri Simba kumsomesha Kaseja ili awe kocha wa makipa wa timu hiyo ya Msimbazi.

“Tena siku hizi kuna mafunzo ya makocha wa makipa. Simba kama wamemchoka wampe nafasi hiyo ili aje kuwa kocha wa makipa siku za baadaye,” alishauri.

Kosta Papic

Kocha wa zamani wa Yanga, Kosta Papic alisema Kaseja asiwe na wasiwasi kwani kwa uwezo wake, lazima atapata timu kubwa ya kuichezea.

Papic, ambaye alizungumza na Mwanaspoti akiwa Afrika Kusini alisema katika hali ya kawaida Si

“Ninachohisi, Kaseja atakuwa ametaka fedha nyingi ndio maana Simba wameamua kuachana naye, sidhani kama wangemuacha bila sababu ya msingi,” alisema Papic.

“Unapokuwa na kiongozi katika timu unajivunia, unapoitaja Simba unamtaja Kaseja, sijui itakuwaje kwa Simba kwa sababu wanampoteza kiongozi wao uwanjani, inaweza kuwasumbua msimu ujao.

“Lakini huenda Simba wanataka damu changa, wanataka mageuzi, kwa hiyo kwa upande mwingine pia huwezi kulaumu, kwa sababu wao ndio wanajua sababu. Hata hivyo Kaseja atapata timu nzuri kwa sababu ana kiwango kizuri,” alisema Papic, ambaye sasa ni kocha wa Black Leopard ya Afrika Kusini, iliyoshuka daraja na ana kazi ya kuipandisha Ligi Kuu Afrika Kusini msimu ujao.

Milovan Cirkovic

Kocha ambaye mashabiki wa Simba wanalaani kutimuliwa kwake, Milovan Cirkovic amepinga uamuzi wa kamati ya usajili kumtema kipa namba moja wa Tanzania, Kaseja.

Milovan alisema: “Nafikiri wamefanya kosa kumuacha. Naamini Kaseja bado ni kipa mzuri na anajua majukumu yake ipasavyo. Ndiyo maana mpaka sasa yuko katika timu ya Taifa Stars.”

“Anaweza akapata timu kubwa nje ya Tanzania. Ni kipa aliyejenga vizuri jina lake kisoka, ni jambo la kushtua  na kukatisha tamaa ingawa anatakiwa kulichukulia kama changamoto katika maisha yake ya soka.”

Sredejovic Milutin ‘Micho’

Kocha wa timu ya taifa ya Uganda, Sredejovic Milutin ‘Micho’ alisema ana uhusiano mzuri sana na Simba na akasema anaheshimu kila wanachokifanya.

“Kwangu mimi nashukuru kwamba kipa wangu wa timu ya taifa ya Uganda, Abeil Dhaira atapata nafasi ya kucheza na kuonyesha kiwango chake Simba, hata hivyo ningependa aonyeshe kiwango chake kwa kupambana na Kaseja na si kwa sababu Kaseja ameondoka,” alisema kwa kifupi kocha huyo wa zamani wa Yanga huku akisisitiza kuwa Simba inapaswa pia kuangalia masilahi ya timu ya taifa ‘Taifa Stars’.
ViaMwanasport.